NGILING BIDAI TAUKA NGILING TIKAI

Kitai iban mayuh saru ngena leka jaku NGILING BIDAI enggau NGILING TIKAI. Ngiling Bidai nya meh leka jaku ke patut bendar dikena kitai madahka diri deka rami nutup gawai. Leka jaku nya endang asal dikena sida aki ini kitai deka madahka diri deka rami nutup gawai. Ti kitai madahka diri NGILING TIKAI, nya enda patut. Jaku nya baka ke madahka diri deka ngiling tikai ke udah dianchau dikena kitai nugongka orang ke dituduh ngelangar adat. Nganchau tikai retinya deka mai orang berandau ngeletak ukum agai otrang ke besalah. Udah tembu nya, kitai pen ngiling tikai. Ti ditukar agai jaku laut, iya munyi tu - GULUNG TIKAR. Leka jaku nya pen jai amat munyi laban madahka kitai iban deka ngulung tikai udah bekau ambis begawai. Ngulung tikai nya dituju agai sida ke enda mujur bisnes. Tang sigi amat endar ga, ti udah ambis gawai, kitai iban mayuh suntuk belanja udah ambis kena begawai. Nya alai, kitai iban mayuh merana diri sepengudah begawai ketegal ambis duit kena bebelika barang enggau ai bisa dikena begawai. Arapka kitai iban ngena jaku NGILING BIDAI kena nutup gawai ila alu anang enda ngembuan siti tikai bidai setiap pintu awak ke bisi dianchau maya gawai ila. Tikai tu mayuh dijual ba Serikin, Bau; rega datai ke RM300 siti, nitihka pemesai enggau pemanah. Iya mega bisi dijual ba kedai ba Water Front, Kuching; rega bisi mar mimit tang ti pandai nagih, angka ulih diturun beberapa puluh ringgit.

Tikai Bidai dijual di Serikin, Bau